Why they don't do Soil Test for Tower Erection???

ဆက်သွယ်ရေး သင်တန်းကျောင်းမှာ သင်တန်းတက်တော့…
ရေဒီယိုစခန်း BTS တခု တည်ဆောက်တော့မယ်ဆိုရင်…
လုပ်ဆောင်ရမယ့် အချက်တွေထဲမှာ… soil test လို့ခေါ်တဲ့…
မြေကြီးကို စမ်းသပ်ရတဲ့ အလုပ်တခုပါပါတယ်။
ဘာလို့ ဒီလုပ်ငန်းစဉ်ကို လုပ်ရတာလဲဆိုရင်…
Antenna နှင့် အခြားစပ်ဆက် ပစ္စည်းများ (Outdoor Unit များ ) တပ်ဆင်ဖို့အတွက် လိုအပ်သော Tower တည်ဆောက်ရန်၊ Indoor Unit များထည့်သွင်းတပ်ဆင်ရမည့် စက်မှု အဆောက်အဦး Technical Building တည်ဆောက်ရန် တို့အတွက်ပဲ ဖြစ်ပါတယ်။
ယင်း အဆောက်အဦးများတည်ဆောက်ရန် အတွက် လျာထားသော မြေနေရာများ၏ မြေသားကြံ့ခိုင်မှု အား စစ်ဆေးရန်လိုအပ်ပါတယ်။
Geologist များ Lab ခန်းမှ စစ်ဆေးရရှိလာတဲ့ Soil Test Result ပေါ်မူတည်ပြီး Tower တည်ဆောက်ရန် Foundation ကို မည်ကဲ့သို့ ပြုလုပ်သင့်တယ်၊ Technical Building တည်ဆောက်ရန် Foundation ကို မည်သို့ ပြုလုပ်သင့်တယ် ဆိုတာကို သိရပါတယ်။
ဒါပေမယ့်…ဒီလုပ်ငန်းစဉ်တွေကို ကျတော် စာမှာပဲ သင်ခဲ့ရပါတယ်…လက်တွေ့မှာ…ကျတော်တို့ မြန်မာပြည် ရဲ့ BTS တည်ဆောက်ခြင်းလုပ်ငန်းများ မှာ Soil Test ကို လုပ်တယ်ဆိုတာ မတွေ့မိသလောက်ကို ရှားပါးပါတယ်။
ဒီ Soil Test လုပ်ဖို့ကိစ္စကို ကျနော်တို့ နိုင်ငံမှာရှိတဲ့ ဆက်သွယ်ရေးပိုင်းက လူကြီးတော်တော်များများက သူတို့ အတွေ့အကြုံအရ လုပ်ဖို့ မလိုဘူးလို့ ပြောပြောပြီး ဒီလုပ်ငန်းစဉ်ကို ကျော်ခဲ့တာကို လဲ တွေ့ရပါတယ်။
ဒီအကြောင်းနဲ့ ပတ်သက်ပြီး ကျတော် အစည်းအဝေးတခုမှာတုန်းက ကျတော်တို့ ဆီကို Hardware & Technology Support လုပ်ပေးတဲ့ နိုင်ငံခြား Company တခုက နိုင်ငံခြားသား က Soil Test လုပ်ဖို့ တိုက်တွန်းလာတာ ကို တခါကြံုဖူးပါတယ်။
အဲဒီတုန်းကလဲ ကျတော်တို့ဆီက လူကြီးက ငါ့အတွေ့အကြံု အရ ဒါကို လုပ်ဖို့ မလိုအပ်ပါဘူး။
ပြီးတော့ ငါတို့မှာ အချိန်မလုံလောက်တဲ့ ပြဿနာလည်းရှိနေပါတယ်။ ငါ နှစ်ပေါင်းများစွာ လုပ်ခဲ့တဲ့ BTS စခန်းတွေ ခုထိ ဘာမှ မဖြစ်သေးတာကို ကြည့်တာနဲ့ သိနိုင်တယ်ဆိုပြီး ပြောတာကိုလည်း ကြံုခဲ့ရပါတယ်။
အဲဒီလိုပြောလိုက်တဲ့ စကားကို နိုင်ငံခြားသားက ဘယ်လိုပြန်ပြောလဲဆိုတော့… မင်းမလုပ်ချင်လို့ မလုပ်ခဲ့တာက ကိစ္စမရှိဘူး…တကယ်လို့ မင်းဒါကို မလုပ်ပဲ ကျော်ခဲ့ပြီး လုပ်ငန်းအားလုံးပြီးမှ Tower တိုင်ကြီး အကြောင်းတခုခုကြောင့် ပြိုလဲသွားတာတို့ တိမ်းစောင်းယိုင်လဲ သွားတာတို့ ဖြစ်ရင် ဒီတာဝန်ကို ဘယ်သူယူမှာလဲ… မင်းယူနိုင်လားမေးပါတယ်။
ဒီအခါမှာလည်း… အဆိုပါ လူကြီးက ငါ တာဝန်ယူတယ်ဆိုပြီး ပြောခဲ့တာကို မှတ်မိပါသေးတယ်။
ဒီနေရာမှာ ကျတော်ပြောချင်တာကတော့… Soil Test လုပ်တဲ့ လုပ်ငန်းစဉ်ဟာ အချိန်အားဖြင့် ၊ ငွေအားဖြင့် သိပ် ပေးရတဲ့ လုပ်ငန်းမဟုတ်ပါဘူး။
မြေသားဆိုတာ အပေါ်ယံ ၄ ပေ ၅ ပေလောက် တူးကြည့်လိုက်တာနဲ့ အောက် ပေ ၄၀၊ ပေ ၅၀ လောက်မှာ ဘာတွေရှိနိုင်လဲ ခန့်မှန်းဖို့ ခက်ခဲပါတယ်။
အပေါ်ယံ မြေသားက Tower ဆောက်ဖို့ အဆင်ပြေပေမယ့်… Foundation အတွက် တူးလိုက်တော့မှ…အမှိုက်တွေထွက်လာတာတို့… အောက်မှာ ရေကြောရှိတာတို့ ဖြစ်လာနိုင်ပါတယ်။
နောက်ဆုံး… ကိုယ့် Foundation အောက်…ပေ ၄၀၊ ပေ ၅၀ လောက်မှာ Tower တိုင် ပြိုလဲ သွားနိုင်တဲ့ အချက်အလက် များရှိနေခဲ့ရင် … ပြဿနာ မဖြစ်နိုင်ပေဘူးလားဗျာ။
မြေကြီးဆိုတာ သဘာအလျောက် ငလျင်လှုပ်ရင် ဖြစ်စေ၊ တခြားအကြောင်းကြောင်းတွေကြောင့် ဖြစ်စေ အတွင်းပိုင်းမှာ ပြောင်းလဲ သွားနိုင်ပါတယ်။
ဒီအချက်တွေကို တွေးဆ ပြီး ဘာမှ အပန်းမကြီး တဲ့ Soil Test ကို မလုပ်ပဲ ကျော်လွှားပစ်တာကို ကျတော်ကတော့ သိပ်ဘဝင်မကျပါဘူး။
အဆိုးဆုံးကတော့…လူကြီးဆိုသူတွေရဲ့ အတွေ့အကြံုတွေကိုပါပဲ။ အထူးသဖြင့်… ကျတော်တို့ နိုင်ငံရဲ့ အစိုးရပိုင်းက ထွက်လာတဲ့ လူကြီးဆိုသူတွေဟာ…ပိုက်ဆံ ရဖို့လောက် ပဲ ခေါင်းထဲ ရှိတဲ့သူတွေက များပါတယ်။
Technical ပိုင်းအရ သိပ်နားမလည်ကြတာ များပါတယ်။
တကယ်လည်း နားမလည်လို့သာ…အခုလို မကျော်လွှားသင့်တဲ့ လုပ်ငန်းစဉ်ကို ကျော်ပစ်ခဲ့တာပေါ့ဗျာ။
ဒီတော့…ကျတော်လည်း… အခုလက်ရှိလုပ်နေတဲ့ GSM Project ကြီးမှာ တည်ဆောက်နေသော Tower တိုင်များ… သတ်မှတ်ထားတဲ့ အချိန်ကာလ အထိ ဘာမှမဖြစ်ပါစေနဲ့လို့ပဲ ဆုတောင်းနေပါတယ်။

ပျော်ရွှင်ပါစေဗျာ။
(Be knowledgeable, pass it on then)